New to site?


Login

Lost password? (X)

Already have an account?


Signup

(X)
Farooq

ቡና ባንክ እና የኢትዮጵያ እግርኳስ ፌዴሬሽን ለ3 ዓመታት የሚቆይ የላቀ አጋርነት ስምምነታቸውን ይፋ አደረጉ

HomeNewsቡና ባንክ እና የኢትዮጵያ እግርኳስ ፌዴሬሽን ለ3 ዓመታት የሚቆይ የላቀ አጋርነት ስምምነታቸውን ይፋ አደረጉ
31
Dec
ቡና ባንክ እና የኢትዮጵያ እግርኳስ ፌዴሬሽን ለ3 ዓመታት የሚቆይ የላቀ አጋርነት ስምምነታቸውን ይፋ አደረጉ
  • Author
    Genet Fekade
  • Comments
    0 Comments
  • Category

• ስምምነቱ ሁሉንም ብሄራዊ ቡድኖች በተለይም የኢትዮጵያ ብሄራዊ እግር ኳስ ቡድንን ስፖንሰር ማድረግ ላይ ያተኩራል

ቡና ባንክ ከኢትዮጵያ እግር ኳስ ፌዴሬሽን ጋር ያደረገውን ለ3 ዓመታት የሚቆይ የላቀ አጋርነት ስምምነት ይፋ አደረገ።
ስምምነቱ ይፋ የተደረገው ዛሬ ታህሳስ 19 ቀን 2014 ዓ.ም የሁለቱም ተቋሞች ተወካዮችና የስፖርት ሚዲያዎች በተገኙበት በሞናርክ ፓርክ ቪው ሆቴል በተዘጋጀው ጋዜጣዊ መግለጫ ላይ ነው።
የላቀ አጋርነት ስምምነቱን ለጋዜጠኞች ይፋ ያደረጉት የኢትዮጵያ እግርኳስ ፌደሬሽን ፕሬዝዳንት አቶ ኢሳያስ ጅራ እና የቡና ባንክ ኮሚዩኒኬሽን እና ፕሮሞሽን ስራ አስኪያጅ አቶ መላኩ ብርሃኑ ናቸው።

ስምምነቱን አስመልክተው የፌዴሬሽኑ ፕሬዚዳንት አቶ ኢሳያስ ጅራ እንዳሉት ቡና ባንክ ከፌዴሬሽኑ ለቀረበለት የስፖንሰር ሺፕ ጥያቄ ከየትኛውም ተቋም ቀድሞ ፈጣን ምላሽ መስጠቱን አድንቀው ብሄራዊ እግር ኳስ ቡድኑ ከዚህ ቀደም ከነበረው ዋና ስፖንሰር በላቀ ቡና ባንክ በፕላቲኒየም ደረጃ ስፖንሰር መሆን በመቻሉ ምስጋና አቅርበዋል።

በሁለቱም ጾታ እና በሁሉም ዕድሜ ክልል የሚገኙ ብሄራዊ እግር ኳስ ቡድኖችን ስፖንሰር ማድረግን የሚያጠቃልለው ይህ ስምምነት በዋናነት የኢትዮጵያ ወንዶች ብሔራዊ ቡድን (ዋልያዎቹ) ላይ ያተኮረ መሆኑንም ተናግረዋል።

ስምምነቱ ለተከታታይ ሶስት አመታት የሚቆይ ሆኖ በየአመቱ እንደሚታደስ የገለጹት አቶ ኢሳያስ የስፖንሰርሺፕ ገንዘብ መጠኑ ብሔራዊ ቡድኑ እንደሚያሳየው ውጤት እና ከባንኩ ጋር እንደሚኖረው የፋይናስን አፈጻጸም ከፍ እያለ የሚሄድ መሆኑንም አብራርተዋል።
የባንኩ ኮሚዩኒኬሽንና ፕሮሞሽን ስራ አስኪያጅ አቶ መላኩ ብርሃኑ በበኩላቸው ቡና ባንክ የኢትዮጵያን ስም በእግርኳስ ዘርፍ ለማስጠራት እየጣረ የሚገኘውንና ሰንደቅ አላማዋን በአለም አቀፍ አደባባይ ለማውለብለብ የሚተጋውን የብሄራዊ እግር ኳስ ቡድን ስፖንሰር በማድረጉ ደስታ ይሰማዋል ብለዋል።
“የኢትዮጵያ ስም በተጠራበት ስፍራ ሁሉ ቡና ባንክ አለ” ያሉት አቶ መላኩ ባንኩ ከኢትዮጵያ እግር ኳስ ፌዴሬሽን ጋር የተፈራረመው የላቀ አጋርነት ስምምነት ከቢዝነስ ግንኙነቱ ባሻገር እግር ኳሱን በማሳደግ ረገድ ያለው ፋይዳ ከፍ ያለ መሆኑንም ጠቁመዋል።
“ብሄራዊ ቡድናችንን መደገፍ ሃላፊነታችን ነው። ከዚህ ቀደም ከኢትዮጵያ ቡና ስፖርት ክለብ ጋር በተመሳሳይ ያደረግነው ስምምነት ሲታከልበት በዚህ ዘርፍ ባንካችን የኮርፖሬት ማህበራዊ ሃላፊነቱን እየተወጣ መሆኑን ማመላከቻ ተደርጎ ሊወሰድ ይችላል” ነው ያሉት።

በስምምነቱ መሰረት የኢትዮጵያ እግርኳስ ፌዴሬሽን እንደተቋም ፣ በፌዴሬሽኑ ስር የሚገኙ ተጨዋቾችን ጨምሮ ሌሎች ሰራተኞች በሙሉ እንደግለሰብ ማንኛውንም የባንክ አገልግሎት በቡና ባንክ በኩል እንዲያገኙ ይደረጋል። በሌላ አነጋገር ቡና ባንክ ይህ ስምምነት እስኪጠናቀቅ ድረስ ለፌዴሬሽኑና ሰራተኞቹ ብቸኛ የባንክ አገልግሎት አቅራቢ ተቋም ይሆናል።

በባንክ አገልግሎት በተጨማሪም ፌዴሬሽኑ በሚያካሂዳቸው ማናቸውም ኹነቶች፣ የፕሬስ መግለጫዎች፣ የህዝብ ግንኙነት መድረኮችም ሆነ የስራ አመራሩ፣ አሰልጣኞችም ሆነ ተጨዋቾች የሚሰጧቸው መግለጫዎች ላይ የቡና ባንክ አርማና የላቀ ደረጃ ስፖንሰርነቱ በጉልህ እንዲታይ ይደረጋል።
ይህ ስምምነት ቡና ባንክ “ዋሊያ” የሚለውን የብሄራዊ እግር ኳስ ቡድን የብራንድ ስም በየትኛውም ዝግጅት ፣ የህዝብ ማስታወቂያዎች፣ የህትመት ውጤቶች እና መሰል እንቅስቃሴዎች ላይ ሁሉ የመጠቀም መብት ይሰጠዋል። በተጨማሪም ባንኩ የፌዴሬሽኑን ህንጻ በአርማው ከማስዋብ እና ማናቸውንም ይፋዊ ማስታወቂያዎች ከመስራት ጀምሮ ከብሄራዊ ክለቦች እና ከፌዴሬሽኑ ጋር በስምምነቱ ማዕቀፍ መሰረት ያልተገደበ ራስን የማስተዋወቂያ ስራ ለመስራት ያስችለዋል።

ከዚህ በኋላ የኢትዮጵያ እግር ኳስ ፌዴሬሽንም ይሁን ብሄራዊ የእግር ኳስ ቡድኖቻችን በሚያካሂዱት ይፋዊ ዝግጅቶች ላይ ሁሉ ከፌዴሬሽኑ አርማ መሳ ለመሳ የቡና ባንክ አርማም አብሮ የሚኖር ይሆናል።

Tags:

    Bunna Bank