New to site?


Login

Lost password? (X)

Already have an account?


Signup

(X)
Farooq

ጠቅላይ ሚኒሰትሩ ነባር ባንኮች ጠንካራና ተወዳዳሪ ለመሆን ወደሚያስችላቸው ምእራፍ መሸጋገር አለባቸው አሉ

HomeNewsጠቅላይ ሚኒሰትሩ ነባር ባንኮች ጠንካራና ተወዳዳሪ ለመሆን ወደሚያስችላቸው ምእራፍ መሸጋገር አለባቸው አሉ
19
Oct
ጠቅላይ ሚኒሰትሩ ነባር ባንኮች ጠንካራና ተወዳዳሪ ለመሆን ወደሚያስችላቸው ምእራፍ መሸጋገር አለባቸው አሉ
  • Author
    Genet Fekade
  • Comments
    0 Comments
  • Category
  • “ሁሉም ባንኮች በዘንድሮ ዓመት ካፒታላቸውን እንዲያሳድጉ እንሰራለን”  
  • “20 አዳዲስ ባንኮች ፍቃድ ለማግኘት በሂደት ላይ ናቸው”

ለአመታት በኢንደስትሪው ውስጥ የቆዩ ነባር ባንኮች ጠንካራ፣ እውነተኛ እና ተወዳዳሪ እንዲሆኑ ወደሚያስችላቸው ምዕራፍ መሸጋገር አንደሚገባቸው ጠቅላይ ሚኒስትር አብይ አህመድ አሳሰቡ

ጠቅላይ ሚኒስትሩ ዛሬ በተካሄደው አምስተኛው የህዝብ ተወካዮች ምክር ቤት ስድስተኛ ዓመት የስራ ዘመን አንደኛ ልዩ ስብሰባ ላይ ተገኝተው ከምክር ቤቱ አባላት ለቀረቡላቸው ጥያቄዎች ምላሽ በሰጡበት ወቅት ነው ይህንን የተናገሩት።

እንደጠቅላይ ሚኒስትሩ ገለጻ በዘንድሮ ዓመት መንግስት የባንኮቹን ካፒታል ጥናት ላይ በተመሰረተ ሁኔታ በማሳደግ  አንድ ምእራፍ እንዲያድጉ ይሰራል  ፡፡

ባለፈው የበጀት ዓመት በባንኮች ከተሰበሰበው ከ1 ትሪሊዮን ብር በላይ ሀብት ውስጥ 60 በመቶ የሚሆነው በአዲስ አበባና አካባቢው ይገኛል ያሉት ጠቅላይ ሚኒስትሩ  ይህ አሃዝ በክልሎች በርካታ የባንክ ቅርንጫፎች መከፈት እንዳለባቸው አመላካች መሆኑን ጠቅሰዋል።

“እዚህ [አዲስ አበባ]  የተከማቸውን የባንክ አቅም ወደ ሁሉም የአገሪቱ ጫፎች በመውሰድ ትንሽም ቢሆን  ወደባንክ የሚገባው ተቀማጭ የገንዘብ መጠን  እንዲያድግ እና ለኢንቨስትመንት እንዲውል ያስፈልጋል” ነው ያሉት በማብራሪያቸው።

 የባንክ ቅርንጫፎች እየበዙ እና የቁጠባ መጠን እየጨመረ ሲሄድ ኢንቨስትመንት እንደሚያድግ የጠቀሱት ጠቅላይ ሚኒስትር አቢይ ስራ አጥነትን ብቻ ሳይሆን የአገሪቱን ኢኮኖሚ የሚያነቃቀቃውም እንዲህ ያለው ተግባር መሆኑን ነው ያሰመሩበት።

ጠቅላይ ሚኒስትሩ እንዳሉት የባንኮች ቁጥር ማደግ ብቻ ሳይሆን የአንድ ባንክ የካፒታል መጠን መጨመር እና የመስራት አቅም መዳበር ወሳኝ ነው። ይህንን ለማረጋገጥም በዚህ ዓመት ባንኮች ካፒታላቸው ከፍ እንዲል እና ትልልቅ የሆኑ ባንኮች እንዲፈጠሩ እንሰራለን ነው ያሉት።

አክለውም ባንኮች ካፒታላቸውን እያሳደጉና የቁጠባ መጠንን እየጨመሩ ካልሄዱ አጠቃላይ ኢኮኖሚው እያደገ በሄደ ቁጥር ተጎጂ ሊሆኑ እንደሚችሉም ተናግረዋል።

ጠቅላይ ሚኒስትሩ የመንግስት ከፍተኛ ድጋፍ እና የፖሊሲ ማሻሻያ አሁን ለተመዘገበው የባንኮች እድገት  ተጠቃሽ ምክንያት ነው ይላሉ።

ለዚህ ማረጋገጫም ብሄራዊ ባንክ የግል ባንኮች የገንዘብ እጥረት እንዳያጋጥማቸው የ 14 ቢሊየን ብር ብድር መስጠቱን ጠቅሰዋል።

ላለፉት ጥቂት አመታት ባንኮች ከሚሰበስቡት ሀብት 27 በመቶ ቦንድ እንዲገዙ ይገደዱ እንደነበር ጨምረው ያስታወሱት ጠቅላይ ሚኒስትር አብይ ይህ አሰራር የባንኮችን ትርፋማነትን ስለቀነሰው በዘንድሮ አመት 27 በመቶ የቦንድ ግዢው እንዲቋረጥ መወሰኑን አንስተዋል።

“በቦንድ ግዢው የተሰበሰበው 15 ቢሊየን ብር ለባንኮች  እንዲለቀቅላቸው መደረጉ ከሌሎች የፖሊሲ እርምጃዎች ጋር ተዳምሮ የባንኩ ዘርፍ እየተነቃቃ እንዲመጣ አመቺ ሁኔታ ፈጥሯል” በማለት ነው ጠቅላይ ሚኒስትሩ የመንግስታቸው ድጋፍ በባንክ ዘርፉ ላይ ስላስገኘው ውጤት ባብራሩበት ርዕሰ ጉዳይ ላይ ያሰመሩበት።

እንደጠቅላይ ሚኒስትር አብይ አህመድ ገለጻ በያዝነው አመት ለብሄራዊ ባንክ የቀረቡ ወደ 20 የሚጠጉ አዳዲስ የባንክ ፍቃድ ጥያቄዎች በሂደት ላይ ናቸው፡፡ ከነዚህ ባንኮች አብዛኛዎቹ ቅድመ ሁኔታውን አሟልተው ወደ ኢንደስትሪው ከተቀላቀሉ በኢኮኖሚው ረገድ የሚጫወቱት ሚና ከፍተኛ ይሆናል ተብሎ እንደሚጠበቅም  ጠ/ሚኒስትሩ በማጠቃለያቸው ተናግረዋል።

(ጥንቅር ፣ ኮ/ኮ/ፕ/ዋና ክፍል)

Tags:

           ቡና ባንክ .

          BUNNA BANK S.C

    ለቡና ባንክ አ.ማ ባለአክስዮኖች በሙሉ

    ዕጩ የዳይሬክተሮች ቦርድ አባላትን ጥቆማ ለመቀበል ተሻሽሎ የወጣ ማስታወቂያ

    የቡና ባንክ አ.ማ የባለአክስዮኖች ጠቅላላ ጉባዔ ታህሳስ 11 ቀን 2013 ዓ.ም ባካሄደው 11ኛ መደበኛ ስብሰባው ያቋቋመው “የዳይሬክተሮች ቦርድ አባላት ጥቆማና አስመራጭ ኮሚቴ” ከሐምሌ 01 ቀን 2013 ዓ.ም ጀምሮ የዕጩ ጥቆማዎችን በመቀበል ላይ የሚገኝ ሲሆን የቦርድ አባላትን ለመጠቆም የሚያስችለውን የጥቆማ መሙያ ቅጽ ከቡና ባንክ አ.ማ ድረ-ገጽ https://www.bunnabanksc.com ወይም አዲስ አበባ ቦሌ መንገድ ሩዋንዳ መታጠፊያ የባንኩ ዋና መስሪያ ቤት 8ኛ ፎቅ ከሚገኘው የኮሚቴው ጽ/ቤት ወይም ከባንኩ ቅርንጫፎች ማግኘት ይቻላል፡፡

    ስለሆነም ባለአክስዮኖች ለዳይሬክተሮች የቦርድ አባልነት ብቁ የሆኑትን ፤ ለባንኩ ሁለንተናዊ ዕድገት ከፍተኛ አስተዋፅኦ ማበርከት የሚችሉትን እና ከታች የተዘረዘሩትን መስፈርቶች የሚያሟሉትን ዕጩዎች በቅፁ ላይ በጥንቃቄ በመሙላት እስከ ጥቅምት 01 ቀን 2014 ዓ.ም ድረስ ብቻ ከላይ በተገለፀው የኮሚቴው ጽ/ቤት በአካል በማቅረብ ወይም አድራሻውን ለቡና ባንክ አ.ማ የዳይሬክተሮች ቦርድ አባላት ጥቆማና አስመራጭ ኮሚቴ በማለት በባንኩ የፓ.ሣ.ቁጥር 1743 ኮድ 1110 በአደራ ደብዳቤ በመላክ ወይም የተሞላውን ቅጽ ስካን በማድረግ ለዚሁ ዓላማ በተዘጋጀው በባንኩ ኢሜይል bibnomination@bunnabanksc.com አያይዛችሁ በመላክ ለባንኩ ዕድገት የበኩላችሁን አስተዋፅኦ እንድታደርጉ ጥሪያችንን እናቀርባለን፡፡

    ተጠቋሚ ዕጩ የዳይሬክተሮች ቦርድ አባላት የሚከተሉትን መስፈርቶች ማሟላት ይጠበቅባቸዋል፡-

    1. በዜግነት ኢትዮጵያዊ/ት ወይም የውጭ ሀገር ዜግነት ካለው/ላት በትውልድ ኢትዮጵያዊ/ት የሆነ/ች፤
    2. ዕድሜው/ዋ 30 ዓመት ወይም ከዚያ በላይ የሆነ/ች፤
    3. የዳይሬክተሮች የቦርድ አባል ሆኖ ቢመረጥ /ሆና ብትመረጥ ለመስራት ፈቃደኛ የሆነ/ች፤
    4. ከታወቀ የከፍተኛ የትምህርት ተቋም ቢያንስ በመጀመሪያ ዲግሪ ወይም በአቻ የትምህርት ደረጃ የተመረቀ/ች፤
    5. የዳይሬክተሮች የቦርድ አባላት ስብስብ በባንክ ስራ፣ በፋይናንስ፣ በአካውንቲንግ፣ በማኔጅመንት፣ በኢኮኖሚክስ፣ በሕግ፣ በቢዝነስ አስተዳደር ፣ በኦዲቲንግ ፣ በኢንፎርሜሽን ቴክኖሎጂ ወይም በኢንቨስትመንት ማኔጅመንት መሠረታዊ ክህሎትን /ችሎታን ያካተተ እና የፆታ ስብጥርን ያገናዘበ ቢሆን ይመረጣል፤
    6. የፋይናንስ ድርጅት የቦርድ ዳይሬክተር ያልሆነ/ች ወይም ዳይሬክተሩ/ሯ 10% ወይም ከዚያ በላይ የባለቤትነት ድርሻ ያልያዘበት/ችበት የንግድ ድርጅት፤
    7. የማንኛውም ባንክ ተቀጣሪ ሠራተኛ ያልሆነ/ች፤
    8. የቡና ባንክ አ.ማ የዳይሬክተሮች ቦርድ ጥቆማና አስመራጭ ኮሚቴ አባል ያልሆነ/ች፤
    9. በግሉ/ሏ ወይም ሌላ ባለአክስዮንን በመወከል በቡና ባንክ አ.ማ ውስጥ ለተከታታይ ስድስት ዓመታት በቦርድ አባልነት አገልግሎ/ላ ከሆነ/ች ከለቀቀበት/ችበት ጊዜ ጀምሮ ስድስት ዓመታት ያለፈው/ፋት፤
    10. በብሔራዊ ባንክ እምነት መሰረት ታማኝ ፣ ሐቀኛ፣ ጠንቃቃ እና መልካም ዝና ያለው/ላት፤
    11. መልካም የፋይናንስ ታሪክና አቋም ያለው/ያላት ፤ የንግድ ሥራን ከመተግበር ወይም ድርጅትን ከመምራት አኳያ በፍርድ ቤት የመክሰር ውሳኔ ያልተላለፈበት/ባት፣ ከታክስ እና ከባንክ ክፍያዎች ጋር በተያያዘ ግዴታዎቹን/ቿን በአግባቡ የተወጣ/ች፤
    12. መልካም ስነምግባር ያለው/ላት፣ከዚህ በፊት በንግድ ማህበር አደራጅነት፣ ዳይሬክተርነት፣ ስራ አስኪያጅነት፣ተቆጣጣሪነት፣ኦዲተርነት ወይም በሌሎች የአመራር ኃላፊነቶች ላይ ተመድቦ/ባ ሲሰራ/ስትሰራ ከኃላፊነቱ/ቷ ጋር በተያያዘ ወይም በማናቸውም ሌላ ሁኔታ በኢትዮጵያ ውስጥም ሆነ ከኢትዮጵያ ውጭ በእምነት ማጉደል፣ በስርቆት ፣ በማጭበርበር፣ በውንብድና ወይም በሌላ ለቦርድ አባልነት ብቁ በማያደርግ ተመሳሳይ ወንጀል በፍ/ቤት ተከሶ/ሳ የጥፋተኝነት ውሳኔ ያልተሰጠበት/ባት፤
    13. ከመንግስት ባለስልጣናት መረጃን በመደበቅ፣ የተሳሳቱ የሂሳብ ወይም ሌሎች ሰነዶችን በመስጠት፣ የተቆጣጣሪ አካላትን ማረጋገጫዎች ባለመቀበል፣ መስፈርቶችን ባለማሟላት ፣ የእርምት ወይም የማስተካከያ እርምጃዎችን ባለመውሰድ ሪከርድ የሌለበት/ባት፤
    14. በኢትዮጵያ ውስጥም ሆነ በውጭ ሃገር በሚገኝ በማናቸውም በፈረሰ ባንክ ውስጥ ዳይሬክተር የነበረ/ች ከሆነ በቅድሚያ ከብሔራዊ ባንክ የጽሁፍ ፈቃድ ማቅረብ የሚችል/ ምትችል፤
    15. ዕጩ ተጠቋሚው በሕግ የሰውነት መብት የተሰጠው ድርጅት ከሆነ፤ ድርጅቱን ወክሎ የሚያገለግል ቋሚ ተወካይ (የተፈጥሮ ሰው) መመደብ ያለበት ሲሆን ይህ ተወካይ ሁሉንም መስፈርቶች ማሟላት ይጠበቅበታል፤
    16. መስፈርቱን የሚያሟሉ ሴት ዕጩዎች ይበረታታሉ፤

     

    ለበለጠ መረጃ ባለአክስዮኖች በስልክ ቁጥር 011-8-722845/011-1-264357 ደውለው ማብራሪያ ማግኘት ይችላሉ፡፡

     

    ማሳሰቢያ፤

    ኮሚቴው ከጥቅምት 01 ቀን 2014 . በኋላ የሚቀርቡ ጥቆማዎችን የማይቀበል መሆኑን ከወዲሁ ያሳስባል!!!

    NameDownloads
    እጩ መጠቆሚያ ቅጽ

    የቡና ባንክ አ.ማ

    የዳይሬክተሮች ቦርድ አባላት አስመራጭ ኮሚቴ

    Bunna Bank